Website Resmi Desa Putrajawa
Kec. Selaawi, Kab. Garut, Prov. Jawa Barat

SAJARAH NGADEGNA DÉSA PUTRAJAWA

Désa Putrajawa resmi ngadeg tanggal 27 Juli 1977, bareng jeung ngadegna Désa Cigawir. Asalna mah Désa Putrajawa jeung Désa Cigawir téh aya dina hiji wengkuan pamaréntahan, nyaéta Désa Cikondang. Ngan sabada jumlah cacah jiwana beuki ngaréaan, antukna Désa Cikondang dibagi deui (dipecah) jadi dua désa, nyaéta Désa Cigawir jeung Désa Putrajawa. (Jumlah cacah jiwa Désa Putrajawa basa ngadeg taun 1977 téh kurang leuwih aya 2.004 jiwa.) Dingaranan Désa Cigawir jeung Désa Putrajawa, ku lantaran kantor pamaréntahan désa perenahna di Kampung Cigawir jeung Kampung Putrajawa.

Boh Désa Cigawir boh Désa Putrajawa, harita kaasup bawahan Kamantrén Selaawi. Ari kacamatanana masih kénéh kaasup Kacamatan Limbangan. Ngan sabada Kamantrén Selaawi statusna dimekarkeun jadi kacamatan mandiri, Désa Cigawir jeung Désa Putrajawa milu kabawah ka Kacamatan Selaawi.

Basa dimekarkeun taun 1977 nepi ka 1980, pajabat administratif anu mingpin Désa Putrajawa téh nyaéta Bapa H.M.E. Shonhaji. Saterusna, ti taun 1980-1985, jabatan kepala désa dituluykeun ku Bapa Iim.

Taun 1985, kakara diayakeun pemilihan kepala désa anu munggaran. Calon-calonna di antarana waé nyaéta Bapa Iim (kepala désa saméméhna, incumbent), Bapa O. Syamsudin (sékrétaris désa saméméhna), jeung Bapa U. Busyaeri (masarakat anu milu daftar jadi calon kadés). Anu kapercayana nyaéta Bapa Iim.

Sabada réngsé masa jabatan, taun 1994 diayakeun deui pemilihan kepala désa anu kadua. Calon-calonna nyaéta Bapa M. Holil jeung Bapa Drs. Aten Isya Anshori. Anu kapilihna nyaéta Bapa M. Holil.

Taun 2002, sabada jabatan Bapa M. Holil réngsé, Désa Putrajawa ngagelar pemilihan anu katilu. Calon-calonna nyaéta Bapa Drs. Aten Isya Anshori jeung Bapa Momon. Anu kapilihna Bapa Drs. Aten Isya Anshori.

Ku ayana aturan anyar ngeunaan masa jabatan kepala désa anu asalna dalapan taun jadi lima taun, nya dina taun 2008 digelar deui pemilihan kepala désa anu kaopat. Calonna masih angger, nyaéta nyaéta Bapa Drs. Aten Isya Anshori jeung Bapa Momon. Sarta anu kapercayana ogé sarua masih kénéh Bapa Drs. Aten Isya Anshori.

Taun 2013, sabada réngsé kapimingpinan Bapa Drs. Atén, digelar pemilihan kepala désa anu kalima. Calon-calonna nyaéta Bapa Suparman jeung Bapa Iim. Anu kapercayana nyaéta Bapa Suparman. Dumasar aturan anyar, harita masa jabatan kepala désa dirobah deui tina lima taun jadi genep taun.

Taun 2019, dina pemilihan kagenep, anu ngandidat jadi calon kepala désa téh nyaéta Bapa Suparman jeung Ibu Tini Rahmawati. Anu kapercayana masih angger Bapa Suparman.

Bulan Séptémber taun 2023, Bapa Suparman ngundurkeun diri tina jabatan kepala désa, lantaran rék milu ngandidat dina pemilihan législatif Kabupatén Garut taun 2024. Ari jabatan kepala désa saheulaanan dicepeng ku Bapa Dadang, S.Ip., Kasi Pemerintahan ti Kacamatan Selaawi.

Bulan Désémber taun 2023, diayakeun pemilihan kepala désa terbatas pikeun ngaganti Bapa Suparman. Calonna nyaéta Bapa Drs. Aten Isya Anshori jeung Bapa Utang Hermawan. Anu kapercayana nyaéta Bapa Utang Hermawan.